SUMENDHE KERSANE ALLAH

Geguritan
Dening Ki Yohanes Sukijo Tejoharsoyo

Wis jamak lumrah
Yen sinebut simbah
Yuswane mesthi kepara turah
Saora orane sewidak tahun munggah
Wis tutug Legi asine uyah
Putra wayah uga nggedhabyah
Bungah susah mesthi kelampah
Nalika jaman penjajah
Anane mung sarwa diprentah
Ora mambu pojok sekolah
Apa maneh mlebu kuliah
Ragate atusan yuta rupiah
Yen putra wayah mangkat sekolah
Simbah paring sangu dinggo tambah
Senajan ragane krasa sayah lan lungkrah
Nanging aja rumangsa wegah
Tansah gumregah
Reresik omah lan umbah-umbah
Rina lan wengi tansah nenuwun mring Allah
Tansah pasrah minangka titah sawantah
Yen wis nyedhaki rekane pejah
Madhep mantep sumarah sowan mring Allah .

Audio Puisi Dibacakan Oleh Ibu Kartika Harsiono

Sinerat , titi surya 13 Maret 2022 .

Redaksi Komsos
Redaksi Komsos

Tim Redaksi Website gerejagamping.org yang dikelola oleh Komsos Gamping. Sekaligus menjadi sarana Komsos untuk bersuara melalui Tulisan.

Articles: 12

Leave a Reply

Alamat email Anda tidak akan dipublikasikan.

Butuh bantuan? Hubungi kami